TVB 琴晚用新綜藝節目迎戰 ViuTV，搞直播 show《開心大綜藝》，有扮林鄭、張竹君、袁國勇、惡搞疫情記招等過期笑話，有網民留言話唔覺意轉台睇到五秒都覺得好老尷。
高層曾志偉被問到有無信心撼贏 ViuTV，佢就話收視冇壓力，而且 TVB 受眾係全球華人，暗指唔當 ViuTV 係對手：「ViuTV 得 4 點收視，節目題材比較偏門，只可以同 J2 比。」佢仲踩 ViuTV 嘅《口罩小姐》（同《開心大綜藝》同時段），話「選港姐就選港姐，戴住個口罩又點選呢？」
曾志偉唔當 ViuTV 係對手，不過就講明想姜濤上 TVB，佢話 ViuTV 魯生唔肯放人，但好多網民都讚魯生決定明智，覺得 TVB 需要姜濤，多過姜濤需要 TVB。
ViuTV 嘅《口罩小姐》琴晚同時段搞決賽，ERROR 被問到點睇收視得 4 點，成員 193 話兩個台受眾唔同，直指 TVB 係老人台：「佢地俾老嘢睇㗎嘛，做好自己就得，收視得幾百部電視機，我地不嬲唔理。」至於曾志偉話 J2 先係 ViuTV 嘅對手，193 串爆話：「J2 係做咩㗎？係咪四十幾歲仲話後生仔傾偈嗰個。」介紹番，J2 有個節目叫《後生仔傾吓偈》，由就快 42 歲嘅六號做主持。
Search